Gravyuralarning birinchisida Mirzo Ulug‘bek yuqorida tilga olingan besh buyuk astronom davrasida aylana stol atrofida o‘tiribdi. Davraga astronomiya ma’budasi Uraniya boshchilik qilib turibdi. Yan Geveliy har bir allomaga tegishli ibratli so‘zlarni ham ushbu tasvirlarga muhrlab qo‘ygan. Ayniqsa, Mirzo Ulug‘bek nomidan bitilgan: “O‘z ishimni munosib avlodlarimga qoldirdim” so‘zlari yoshlarimizni ilm–fan sohasida ibratli ishlarni amalga oshirishga chorlaydi.

Mirzo Ulug‘bekning yulduzlar katalogini Yevropada ilk bor 1648–yili mashhur ilm–fan markazlaridan bo‘lgan Oksford universitetida Jon Grivs nashr ettirgan. Shundan so‘ng buyuk allomaning ilmiy asarlari jahonning turli mamlakatlarida ketma–ket chop etildi.

Mirzo Ulug‘bek rasadxonasi maketi.
(M. S. Bulatov rekonstruksiyasi)

Mirzo Ulug‘bek muzeyining yangi binosi O‘zbekiston Prezidenti Islom Karimov tashabbusi bilan 2010 yilda barpo etildi. Muzey binosining peshtoqi o‘rta asr madrasasi shaklida qurilgan bo‘lib, rasadxonaning poydevori va ulkan uskunasi – kvadrant bilan birgalikda yaxlit ansamblni tashkil etadi. Bu yerga tashrif buyurgan mehmonlar o‘zlarini beixtiyor XV asr rasadxonasiga kelib qolganday his etadilar.